Mürşid-i kâmile eylersen hizmet
Riyâdan kurtulur alırsın himmet
Kendini bilmezle eyleme ülfet
Ârif ol mekteb-i irfâne yürü

Ehlullah yoludur râh-ı tarîkat
Erişir maksûda edenler hizmet
Azîzim var ise sende bir niyyet
Merd olup bu yolda merdâne yürü

Erer ma’rifete dilleri sâfî
Eğer safdil isen bu sözler kâfî
Dinle sen beyhûde eyleme lâfı
Hemen var gayret-i îmâne yürü

Tarîk-i Sübhân’dan al haberi sen
Şeytâna yüz verme huzûr ararsan
Nefsinle cenk eyle eğer merd isen
İki âlem içre merdâne yürü

Az söyle âlemde olasın irfân
Makbuldür demişler sükût-i insân
Her kîl ü kâle eyleme seyrân
Kûşe-i uzletde bîgâne yürü

Gel özün düşürme belâ-yı nefse
Çalış düşmeyesin safâ-yı nefse
Bunca zamandır uydun hevâ-yı nefse
Biraz da tarîk-i Sübhân’a yürü

Eğer bildin ise derd ü mihnetden
Her yerde dem vurma ilm-i hikmetden
Bir katre getirdim bahr-i ummandan
İçersen zemzem-i peymâne yürü

Nefse tâbi’ olup gezme hevâyî
Tevekkül bâbında gözle rızâyı
Evvel kendini bil sonra Hudâ’yı
Cehd edip tarîk-i Sübhân’a yürü

Dinle bu kıssadan hisse al bâri
Takmadan boynuna İblis yuları
Bîçâre taşradan eyleme zârı
Durma gel şu bezm-i cânâne yürü

Deryâ-yı ulûmun bulunmaz dibi
Böyle buyurmuşdur Sultân-ı Nebî
Sîretin pâk ise sûretin gibi
Ol zaman tevhîd-i devrâne yürü

Emrah her kâra eylemez heves
Eğer ârif isen söyle bir nefes
Muhabbet riştesin mâsivâdan kes
Var kendi hâlinde mestâne yürü