Kime varub yalvarayım kapunı koyub ey Hudâ
Bir bende-i bî-çâreyim boynum eğüb geldim sana
****
Destim tehî yüzüm siyâh geldim sana ey pâdişâh
Dâ’im işim efgân ü âh ol dest-gîr lutf it bana
****
Girdâb-ı hicre düşmişem şevkin odına bişmişem
Al destimi ki şaşmışam sen derdime eyle devâ
****
Sana benim hâlim ‘ayân lâzım değil itmek beyân
Sensin mu’în ü müste’ân ‘avn eyle gel bana şehâ
****
Nefsin uyub sevdâsına taldım günâh deryâsına
Eyle ilâç dil pâsına kılma beni senden cüdâ
****
Hîç sana kulluk itmedim buyurdığını tutmadım
Râh-ı rızâya gitmedim oldı kamu ‘ömrüm hebâ
****
‘Işk-ı mecâzdan geçmedim hamr-i hakîkî içmedim
Yahşi yamanı seçmedim itdim hevâya iktidâ
****
Dostun Muhammed hakkiçün koyma bizi zâr u zebûn
Kudret yedinle câmı sun çıksun gönülden mâ-sivâ
****
Yok nideyim kâmil delîl kaldım yetîm oldum zelîl
Gönlüm hazîn cismim ‘alîl bu renclere virgil şifâ
****
Ey sâhib-i fazl u kerem Kuddûsîye vir câm-ı Cem
Artsun safâsı dem-be-dem ana gerekmez mâ’adâ

Ahmed Kuddusi