Terk-i cândır kurb-i Rabbi’l-İzzet’e şart-ı vusûl
Himmet et ol devlet-i uzmâyı kesbe çâre bul
Zevki yok âlâmı çok ömre nihâyet ver oğul
Vâdî-i aşkın çekil iklîm-i feyz-efzâsına
Hâzır ol oğlum Hüseynim Kerbelâ kavgâsına
Kârbân-ı Ehl-i Beyt’i çek belâ sahrâsına
****
Etmedikçe âşık-ı müştâk ifnâ-yı vücûd
Görmez envâr-ı hakîkatden tecellâ-yı şuhûd
Hâk u hûna düşmedikçe yokdur imkân-ı su’ûd
Bar-gâh-ı sidrenin bâm-ı felek-fersâsına
Hâzır ol oğlum Hüseynim Kerbelâ kavgâsına
Kârbân-ı Ehl-i Beyt’i çek belâ sahrâsına
****
Zebhden bâk etme çün ibnü’z-zebîhin oğlusun
Şibl-i Hayder’sin dahî Sultân-ı Kevneyn oğlusun
Cilve-fermâ-yı makâm-ı “kâbe kavseyn” oğlusun
Çık azîzim sen de kavs-i kurbun “ev ednâ”sına
Hâzır ol oğlum Hüseynim Kerbelâ kavgâsına
Kârbân-ı Ehl-i Beyt’i çek belâ sahrâsına
****
Ger tekarrübse murâdın aşk şâhen-şâhına
Var götür kurbânların teslîm-i bismil-gâhına
Bakma bî-kes ümmehâtın nâle-i cân-gâhına
Hem ilişme onların feryâd u vâveylâsına
Hâzır ol oğlum Hüseynim Kerbelâ kavgâsına
Kârbân-ı Ehl-i Beyt’i çek belâ sahrâsına
****
Katlini temhîd için bî-hâb u râhatdır Yezîd
Etme tedbîrinden ashâb-ı Sakîf’i nâ-ümîd
Olsun a’dâ-yı Hudâ tenhâlığından müstefîd
Ninova’nın rıhlet eyle deşt-i şîven-zâsına
Hâzır ol oğlum Hüseynim Kerbelâ kavgâsına
Kârbân-ı Ehl-i Beyt’i çek belâ sahrâsına
****
Ummadık cevri bana bu kavm-i gaddâr etdiler
Emrimi müstehziyâne redd ü inkâr etdiler
Âkıbet Kur’ân’ı da “ihrâk-bi’n-nâr” etdiler
Gayrı ma’nâ verdiler elfâzına imlâsına
Hâzır ol oğlum Hüseynim Kerbelâ kavgâsına
Kârbân-ı Ehl-i Beyt’i çek belâ sahrâsına
****
Şer’imi tezyîfe kalkışdı gürûh-i eşkıyâ
Pâ-yi tahkîrâtla çiğnendi ahkâm-ı Hudâ
Çekdiğim zahmetler oldu hep hebâ-ender-hebâ
Büsbütün mahvolmadan bâri çalış ihyâsına
Âlet oldu dîn-i Hak — lerin dünyâsına
Hâzır ol oğlum Hüseynim Kerbelâ kavgâsına
Kârbân-ı Ehl-i Beyt’i çek belâ sahrâsına
****
Basdı tûfân-ı dalâlet arzı ey Nûh-i zamân
Ümmet-i merhûmeyi fülk-i necâta al hemân
Aç o fülk-i himmete kanlı kefenden bâd-bân
Zevrâk-ı cismin dahî sal hâk ü hûn deryâsına
Hâzır ol oğlum Hüseynim Kerbelâ kavgâsına
Kârbân-ı Ehl-i Beyt’i çek belâ sahrâsına
****
Bildiğim mahlûk ise bu zümre-i Mervâniyân
Bî-hayâ bir kavmdir mazlûma vermezler amân
Kân dökerler ahz-i sâr etmek dilerler her zamân
Benden ol Bedr ü Huneyn işbâhına ircâsına
Hâzır ol oğlum Hüseynim Kerbelâ kavgâsına
Kârbân-ı Ehl-i Beyt’i çek belâ sahrâsına
****
Hârikulâde şahâdetle eyâ Şâh-ı Hicâz
Enbiyâ vü evliyâdan bul kemâl-i imtiyâz
İsm-i pâkin lâl-gûn kânınla nârullah yaz
Bâr-gâh-ı Zü’l-Celâl’in târem-i a’lâsına
Hâzır ol oğlum Hüseynim Kerbelâ kavgâsına
Kârbân-ı Ehl-i Beyt’i çek belâ sahrâsına
****
Kânına kânı karışsın şîr-hâre Asgar’ın
Gark-ı hûn olsun dahî Abbas u Avn u Ca’fer’in
Hilkaten hulkan bana benzer Aliyyü’l-Ekber’in
Kendi destinle kefen giydir kadd-i zîbâsına
Hâzır ol oğlum Hüseynim Kerbelâ kavgâsına
Kârbân-ı Ehl-i Beyt’i çek belâ sahrâsına
****
Kardeşin kolsuz şehîd olsun da devrilsin ‘alem
Şerbet-i şâfî deyû bîmârın içsin zehr-i gam
Âhuvân-ı Yesrib ü Bathâ gazâlân-ı Harem
Cümle sayd olsun diyâr-ı Kûfe’nin nesnâsına
Hâzır ol oğlum Hüseynim Kerbelâ kavgâsına
Kârbân-ı Ehl-i Beyt’i çek belâ sahrâsına
****
Destine değmezse âşûrâda ger âb-ı Fırât
Abdest al kân ile kıl âşıkane bir salât
Titresin tekbîr ü tehlîlinden oğlum kâinât
Lâyık olsun kıldığın mevlâların Mevlâ’sına
Hâzır ol oğlum Hüseynim Kerbelâ kavgâsına
Kârbân-ı Ehl-i Beyt’i çek belâ sahrâsına
****
Zahm-ı hûnîn-i şehîdân gül gibi hâlâ güler
Güller açmışdır ten-i nâziklerinde yâreler
Gülşen-i Peygamber’i seyretmek istersen eğer
Uğra bir dem Kerbelâ’nın dil-güşâ sahrâsına
Hâzır ol oğlum Hüseynim Kerbelâ kavgâsına
Kârbân-ı Ehl-i Beyt’i çek belâ sahrâsına
****
Seyr kıl bir kerre sen ol zâhid-i bî-gayreti
Eylemiş bu feyzden mahrûm ehl-i sünneti
Kendisince ‘ıyd-i ekberdir mezârın vahşeti
Kim ki eyler i’tinâ Şâh-ı Şehîd’in yâsına
Hâzır ol oğlum Hüseynim Kerbelâ kavgâsına
Kârbân-ı Ehl-i Beyt’i çek belâ sahrâsına